Dar linn go dtugann ráitis airgeadais Phort Bhaile Átha Cliath Teoranta (na “ráitis airgeadais”):

• léargas fíor agus cóir ar shócmhainní, ar dhliteanais agus ar staid airgeadais na Cuideachta amhail an 31 Nollaig 2016 agus ar a sreafaí brabúis agus airgid thirim don bhliain dar críoch sin;
• go bhfuil na ráitis airgeadais ullmhaithe i gceart i gcomhréir leis an gCleachtas Cuntasaíochta a bhfuil Glacadh Leis go Ginearálta in Éirinn; agus
• go bhfuil na ráitis airgeadais ullmhaithe i gceart i gcomhréir le riachtanais Acht na gCuideachtaí 2014.

Is éard atá sna ráitis airgeadais ná:

• an Clár Comhardaithe amhail an 31 Nollaig 2016;
• an Cuntas Brabúis agus Caillteanais don bhliain dar críoch sin;
• an Ráiteas ar Ioncam Cuimsitheach don bhliain dar críoch sin;
• an Ráiteas ar Athruithe Gnáthscaireanna don bhliain dar críoch sin;
• an Ráiteas ar Shreafaí Airgid don bhliain dar críoch sin;
• na Polasaithe Cuntasaíochta; agus
• na Nótaí a ghabhann leis na Ráitis Airgeadais, a bhfuil faisnéis eile mhíniúcháin iontu.

Is é an creat um thuairisciú airgeadais a cuireadh i bhfeidhm le linn do na ráitis airgeadais a bheith á n-ullmhú ná dlí na hÉireann agus na caighdeáin chuntasaíochta arna n-eisiúint ag an gComhairle um Thuairisciú Airgeadais agus arna gcuireadh i bhfeidhm ag Institiúid na gCuntasóirí Cairte in Éirinn (an Cleachtas Cuntasaíochta a bhfuil Glacadh Leis go Ginearálta in Éirinn), lena n-áirítear FRS 102 “An Caighdeán um Thuairisciú Airgeadais atá infheidhme sa Ríocht Aontaithe agus i bPoblacht na hÉireann”.

Le linn don chreat um thuairisciú airgeadais a bheith á chur i bhfeidhm, rinne na stiúrthóirí roinnt breithiúnas suibiachtúil, i leith meastachán suntasach cuntasaíochta mar shampla. Le linn do na meastacháin sin a bheith á ndéanamh, rinne siad toimhdí agus chuir siad imeachtaí todhchaíocha san áireamh.

• Tá an fhaisnéis agus na míniúcháin ar fad faighte againn a mheasaimid go bhfuil siad riachtanach chun críocha an iniúchta againn.
• Dar linn gur leor taifid chuntasaíochta na cuideachta chun iniúchadh réidh agus ceart a dhéanamh ar na ráitis airgeadais.
• Tá na ráitis airgeadais ag teacht leis na taifid chuntasaíochta.
• Dar linn go gcloíonn an fhaisnéis a thugtar i dTuarascáil na Stiúrthóirí leis na ráitis airgeadais.

Luach saothair agus idirbhearta na Stiúrthóirí

Faoi Acht na gCuideachtaí 2014, éilítear orainn a thuairisciú duit mura ndearnadh luach saothair agus idirbhearta na Stiúrthóirí a nochtadh mar atá sonraithe in ailt 305 go dtí 312 den Acht, de réir ár dtuairime. Níl aon eisceachtaí le tuairisciú againn a eascraíonn as an bhfreagracht sin.

Cód Cleachtais chun Comhlachtaí Stáit a Rialú

Faoin gCód Cleachtais chun Comhlachtaí Stáit a Rialú (“an Cód”), éilítear orainn a thuairisciú duit mura léiríonn an ráiteas maidir le córas an rialaithe inmheánaigh airgeadais atá riachtanach faoin gCód, mar atá curtha san áireamh sa Ráiteas ar Rialachas Corparáideach ar leathanaigh 16 agus 17, go bhfuil an Chuideachta ag cloí le mír 13.1 (iii) den Chód nó nach bhfuil an ráiteas ag teacht leis an bhfaisnéis atá ar eolas againn mar thoradh ar ár n-obair iniúchta ar na ráitis airgeadais. Níl aon eisceachtaí le tuairisciú againn a eascraíonn as an bhfreagracht sin.

Ár bhfreagrachtaí agus freagrachtaí na Stiúrthóirí

Mar a thugtar míniú níos iomláine air sa Ráiteas ar Fhreagrachtaí na Stiúrthóirí atá leagtha amach ar leathanach 12, is iad na Stiúrthóirí atá freagrach as na ráitis airgeadais a ullmhú agus as a bheith sásta go dtugtar léargas fíor agus cóir iontu.

Táimid freagrach as iniúchadh a dhéanamh ar na ráitis airgeadais agus as tuairim a chur in iúl ina leith, i gcomhréir le dlí na hÉireann agus le Caighdeáin Idirnáisiúnta Iniúchóireachta (an RA agus Éire). Faoi na caighdeáin sin, éilítear orainn cloí le Caighdeáin Eiticiúla na nIniúchóirí de chuid an Bhoird um Chleachtais Iniúchóireachta.

Ullmhaíodh an tuarascáil seo, na tuairimí san áireamh, le haghaidh bhaill an chuideachta mar chomhlacht, i gcomhréir le halt 391 d’Acht na gCuideachtaí 2014 agus chun na críche sin amháin. Trí na tuairimí sin a thabhairt, ní ghlacaimid agus ní ghabhaimid freagracht orainn féin ar mhaithe le haon chríoch eile ná le haon duine eile a dtaispeánfar an tuarascáil seo dóibh nó a bhfaighidh seilbh uirthi, ach amháin nuair a aontaítear é sin go sainráite i scríbhinn roimh ré.

Cad é atá I gceist le hiniúchadh ar na ráitis airgeadais

Rinneamar ár n-iniúchadh i gcomhréir le Caighdeáin Idirnáisiúnta Iniúchóireachta (an RA agus Éire). Is éard is iniúchadh ann ná nuair a dhéantar fianaise a fháil faoi na suimeanna agus an fhaisnéis nochta atá sna ráitis airgeadais, ar leor iad chun gealltanas réasúnta a thabhairt go bhfuil na ráitis airgeadais saor ó mhíráiteas ábhartha, cibé an chalaois nó earráid ba chúis leis. Mar chuid den iniúchadh, déantar na rudaí seo a mheas:

• cibé an bhfuil na polasaithe cuntasaíochta oiriúnach d’imthosca na Cuideachta, ar cuireadh i bhfeidhm go comhsheasmhach iad agus ar nochtadh go leordhóthanach iad;
• a réasúnta agus atá meastacháin shuntasacha chuntasaíochta na Stiúrthóirí; agus
• cur i láthair foriomlán na ráiteas airgeadais.

Dírímid ár gcuid oibre go príomha ar na réimsí sin trí bhreithiúnais na Stiúrthóirí a mheas i gcoinne na fianaise a bhfuil fáil uirthi, agus déanaimid ár mbreithiúnais féin. Chomh maith leis sin, déanfaimid measúnú ar an bhfaisnéis a nochtar sna ráitis airgeadais.

Déanaimid faisnéis a thástáil agus a scrúdú, trí úsáid a bhaint as an tsampláil agus as teicnící eile iniúchóireachta, sa mhéad a mheasaimid a bheith riachtanach chun bunús réasúnta a sholáthar chun teacht ar ár dtuairimí féin. Faighimid fianaise trí éifeachtúlacht na rialuithe, na nósanna imeachta tábhachtacha nó meascáin den dá rud sin a thástáil.

Ina theannta sin, léimid an fhaisnéis airgeadais agus neamhairgeadais ar fad atá sa Tuarascáil Bhliantúil chun míráitis airgeadais leis na ráitis iniúchta airgeadais a aithint, agus chun aon fhaisnéis atá mícheart ó thaobh ábhair de bunaithe ar an bhfaisnéis a fuaireamar i gcúrsa an iniúchta, nó nach dtagann leis an bhfaisnéis sin de réir ábhair de, a aithint. Má chuirtear aon mhíráitis nó neamhréireachtaí dealraitheacha ábhair in iúl dúinn, déanfaimid a dtionchair dár dtuarascáil a mheas.